Tuah Lawng Azalo, Tuahlo Zong Abiapi

Tuah lawng hi azalo tuahlo zong abiapi, zeicatiah ‘tuah’ i atlinnak cu ‘tuahlo’ a si. Thilṭha tuah lawnglawng hi azalo, thilṭha atuahmi nih thilṭhalo kan tuahlo zong hi a biapi. Thilṭha kan tuahmi atlinnak taktak cu thilṭhalo kan tuahlo hi a si. Cubantuk ṭhiamṭhiam in thilṭhalo tuahlo lawng azalo thilṭha kan tuah hrimhrim awk a si. Zeicatiah, tuah dingmi thilṭha tuahlo cu thilṭhalo tuah he aa dannak zeihmanh a um lo.

 Thilṭha kan timi cu ‘kanmah atuahtu kan caah siseh, a intu an caah siseh, sermi thil vialte an caah siseh, zeihmanh asiloah ahohmanh an caah siseh, harnat le boibainak achuahter lomi tuahsernak kha  si’, phungdang in kan chim ahcun, ‘a ṭhami tuahsernak chungin thilṭha achuak asiloah a ṭhami tuahserhnak chungin achuakmi kha thilṭha kan timi cu a si’, sihmahsehlaw ahomanh an caah harnat le boibainak achuahtertu tuahsernak cu tuahsernak ṭhalo a si i cucu ‘thilṭhalo’ kan timi cu a si.

Mi pakhat caah thilṭha a si tiah na ruahmi na tuah piak tikah adang mi pakhat caah hnahnawhnak asiloah lungsilonak a um ahcun khua fak piin ruat ṭhan aherh ti na hngalh ahau, zeicatiah a ṭhami tuahserhnak nih thilṭhalo achuahpi awk hrimhrim a si lo. Haikung nih achuahpimi thingthei cu hai a si awk a si i mitsur ruang chungin mitsur thei hlei in thingthei dang a chuak hrimhrim awk a si lo. Cuve bantuk cun, tuahsernak ṭha nihcun thilṭha lawnglanwg kha a chuahpi zungzal ko lai.

Thilṭhalo ka tuah ko nain thilṭha zong tampi ka tuah ve ko tiah lunghmui tuk in um hlah, zeicatiah athiangmi dinti ah tichia tlawmpal te na peih ahcun cu dinti cu din awk a ṭha rih ko na ti kho maw: dinti caah a ṭha naisai ti lo. Sihmanhsehlaw, thilṭhalo ka tuah tiin lungdongh in um peng fawn hlah; na lungithlen, na sining ithlen law sertharmi si i zuam zungzal, zeicatiah tichia cu tiṭha ah serṭhan khawh a si.