Na Biakmi Hrawkhraltu ‘Nangmah’

Zing thawhle cangka in Pathian sinah thla cam, zan ih hlan teah khukbil in thla cam; kan duhmi cu kan in hal maw Pathian, sihmanhsehlaw Khuazing Pathian, kan in halmi vialte hna hi kanmah duhning siloin nangmah duh bang si ko seh- Vancung khua i a ummi kan Biakmi kan Pathian, Vancung ah na duhnak tuah a si bantuk in hi vawlei zongah tuah si ve ko seh kan ti, mah duhnak nakin Pathian duhnak tuah kha a biapi deuh ah chiahding a si tiah kan ti. Zeiruang ah?

Zeiruang ah? Bawipa Pathian cu zeidang vialte nakin a nganbik, vawlei cung le vawlei tang  um sermi vialte hi Amah sermi an si i Amah ta lawngte an si i Amah thongin a ummi an si i Amah duhning tein a umtermi hna an si- bawi vialte lakah Bawibik, amah hlei in Pathian dang le a mah thluk in bochanh awk le zumh awkthlak dang an um lo ti kan hngalh i kan zumh caah a si.

Pathian cu zeidang vialte cungah nawlngeihtu a si, kan nunnak ngeihtu le uktu a si, amah duhnak tuah kha kanmah duhnak nain a biapi deuh ah kan chiah lai kan ti ko nain cheukhat Khrihfa hna nih;

1.      Pathian duhnak nakin mah duhnak tuah kha biapi deuh ah kan chiah;

2.      Pathian min cu kan auh sihmanhsehlaw kanmah tein pathian dang kan i ser;

3.      Kan isermi le kan biakmi le a nawl kan zulhmi pathian cu kan pumsa duhnak kha a si;

4.    Kan isermi pathian cu kanmah kha kan si, zeicatiah kanmah duhnak kha biapi bik ah kan chiah caah;

5.      Khuazing Pathian, ‘nangmah duhnak tuah si ko seh, na duh bangin si ko seh,’ tiah Pathian hmai le kanmah le mah hmai ah lihbia kan chim;

6.    Vailam tung can ah kanmah duhnak le duhmi kha kan liang ah kan ikhinh i kan pawngkam zoh loin kan thli thluahmah.

Cucaah nangmah zong, khua fak piin ruat ṭhan ve cang! Na biakmi hi aho dah a si? Nangmah lila aa biakmi na si ve maw? Nangmah nih na biakmi cu nangmah na si sual maw? Na duhnak kha Pathian duhnak nakin ngan deuh le biapi deuh ah na chiah sual maw? Nangmah duhning in maw na nung Pathian duhning in dah? An uktu ahodah a si, nangmah maw?

Kan Chungkhar ah Pathian a um maw? Pathian duhnak kha chungkhar le khua le ram caah rian kan ṭuannak asiloah kan ihruainak ah biapi bikah chiah loin kanmah duhning le duhnak kha a biapi deuh ah kan chiah ahcun hrawkhralnak khor chungah kan tla lai. Nangmah, Na Chungkhar, Na ram hrawkhraltu cu na biakmi NANGMAH kha a si.